Da maestra a maestra · Materiali gratuiti, senza iscrizione

Da maestra a maestra

Poesie natale Natale a Napoli

Poesie Natale

Natale...a Napoli

Natale...a Napoli E' nnato Nennillo, è nnato 'a speranza d'o munno Uhè genta gè, si 'mbietto 'nu core tenite, nun state 'jnte case 'nzerrate, ascite, ascite 'cca fore, ch'è 'nnato 'lù Ninno che porta 'a speranza p' 'o munno, è 'nnato 'o Signore de tutte 'e Signore, è 'nnato lu rè padrone d'e rè, che gioia 'jnt 'o core a purtate. Guardammece attuorne cu' l'uocchie, e 'na vota, sciùglimme sti file 'e speranza, c' 'avimme 'ndricciate, ascite, ascite, e 'ncielo guardate! 'stu bellu splennore da stella cu' a cora, fa luce e rè maggie, pè vie l 'accumpagne, a ddò ce stà Ninno, è 'overe, è 'overe che pace me sente, e vuie a sentite? Guardannece attuorno, cchiù 'ddoce è 'o sapore d'à vita, c'addore 'jint'a 'Ilaria de frutte e ciardini, cu 'o genio 'jnt'o core e vulerce cchiù bene, pizziente, rignante, stanotte so' eguale, scetateve gente, è 'overe è Natale. Hoi suonne vattenne, si già stò sunnanno, vurria sta nottata n'àvessa furnì, si' pace p'ò munno nuie stamme priànno, 'a chistu creature che mò st'à durmì. E dorme 'o ninnillo, 'nmiezo 'ammuina, è annuro e 'sti carne sò fredde po' ggelo, culore e 'nu sciore, culore d'è rose, sunate 'nzampogne, sunate 'a novena, sunate pe' chi natale nun crere, sunate pè' chillo cà fatto e fa bbene. Sunate p'àmmore, cù tutto 'nu sciato, si pure 'mò fosse pè l'urdema vota, purtate 'a nuvela 'jind 'e core dà gente, facimme 'mmuina cu' gioia, alluccate, cantate, sunate e 'nziemo abballate, Natale 'mo nasce, 'a vita se sceta, 'na veppeta 'e vino, 'a chi tene seta, scurdammece 'o male, ci' 'aiuta a fa bene, sunate 'nzampogne pè chi resta sulo, pà mamma ca prega p'o' figlio malato, pe' chi sta nottata 'o carcere 'o scuro, pe chillo cà tremma e' 'nu friddo 'e paura. Pecchè 'jnt'à vita, nun se sente o' sicuro, facite e 'stu suono che sana 'sta terra, che ferma pè sempe l'odio d' e guerre, sunate 'nzampogne pè tutte 'sti chiese, scetatele 'a gente, che nate 'o Signore, p'e chillo che campa, cu' 'a mana stesa, pà genta ch'è sazia e nun crere 'o riuno, pe chillo che dorme ncopp' 'e cartune, sunate, sunate pè chisto e pè chillo, stà santa nuttata è nnato 'o Nennillo. [Mario Vastarella] QUANNO NASCETTE NINNO S. Alfonso Maria De' Liguori Quanno nascette Ninno, quanno nascette Ninno a Betlemme, era notte e pareva miezojuorno... Maje le stelle,lustre e belle, se vedèttero accussí... e 'a cchiù lucente, jette a chiammá li Magge a ll'Uriente. De pressa se scetajeno de pressa se scetajeno ll'aucielle... cantanno de na forma tutta nova: Pe' nsi' 'agrille,co' li strille, e zompanno 'a ccá e 'a llá: - E' nato! E' nato! - - decévano - lo Dio che nce ha criato! - Co' tutto ch'era vierno, co' tutto ch'era vierno, Ninno bello, nascettero a migliara rose e sciure... Pe' nsi' 'o ffieno,sicco e tuosto, ca fuje puosto sott'a te, se 'nfigliulette e de frunnelle e sciure se vestette... A no paese che, a no paese che se chiamma Ngadde, sciurettero le vvigne e ascette ll'uva. Ninno mio sapuretiello, rappusciello d'uva si' tu... ca, tutt'ammore, faje doce 'a vocca e po' 'mbriache 'e core! Non c'erano nemice non c'erano nemice pe' la terra: La pecora pasceva co' 'o lione Co''o capretto,se vedette 'o liupardo pazzeá... Ll'urzo e 'o vetiello e, co' lo lupo, 'mpace 'o pecoriello. S'arrevotaje 'nsomma s'arrevotaje 'nsomma tutt''o munno: lo cielo, 'a terra, 'o mare e tutt''e ggente... Chi dormeva, se senteva 'mpiett''o core pazzeá pe' la prejezza; E se sonnava pace e contentezza... Guardavano le ppecore, guardavano le ppecore, 'e Pasture... E n'Angelo, sbrennente cchiù d''o sole, Comparette e lle decette: - No ve spaventate, no! Contento e riso! la terra è addeventata Paraviso! - A vuje è nato ogge, A vuje è nato ogge, a Bettalemme, d''o munno, ll'aspettato Sarvatore... Dint''e panne 'o trovarrite, non potite maje sgarrá, arravogliato... e dint'a lu Presebbio corecato... A meliune ll'Angiule a meliune ll'Angiule calaro... co' chiste se mettettero a cantare; - Gloria a Dio, pace 'nterra Nu' cchiù guerra...è nato giá lo rre d'ammore che dá prejezza e pace a ogne core... - Sbatteva 'o core 'mpietto sbatteva 'o core 'mpietto a sti Pasture e ll'uno po' deceva 'nfacci'a ll'ato: - Ché tardammo? priesto, jammo ca mme sento ascevolí pe' lo golío ca tengo de vedé stu Ninno Dio!... Zompanno comm'a ciévere zompanno comm'a ciévere ferute, jettero li pasture a la capanna... Llá trovajeno a Maria co' Giusepe e 'a Gioja mia e 'nchillo Viso provajeno no muorzo 'e Paraviso.. Restajeno 'ncantate restajeno 'ncantate e voccapierte pe' tantu tiempo senza di' parola... po' jettanno, lacremanno, no sospiro pe' sfogá... da dint''o core, cacciajeno, a migliara, atte d'ammore. C''a scusa de donare c''a scusa de donare li presiente se jettero azzeccanno chiano chiano... Ninno no' li rifiutaje ll'azzettaje, comm'a che, po' lle mettette la mano 'ncapa e li benedicette... Piglianno confedenzia piglianno confedenzia a poco a poco, cercajeno lecenzia a la Madonna... Se magnajeno li pedille co vasille, 'mprimma e po' chelle mmanelle... a ll'urdemo, lo musso e 'e mascarielle... Po' assieme se mettettero po' assieme se mettettero a sonare e a cantá co' ll'Angiule e Maria co' na voce, accossí doce, ca Gesù facette: Aaaah - há... e po' chiudette chill'uocchie aggraziate e s'addurmette. La nonna che cantajeno la nonna che cantajeno a me mme pare ch'avett''a èsse' chella ca mo dico: Ma 'nfrattanto io la canto, 'mmaggenateve de stá co li pasture vicino a Ninno bello vuje pure...

N'

N' 'atu Natale" Pe d'int' 'a ll' aria già se sente àddore 'e chella frutta fresca d' 'e ciardine, me sente 'ca me sbatte chhiu' stu' core 'mo' ca Natale chiano s'avvicine. Già se 'so mmise 'e prime bancarelle, già sento e 'vveco 'e prime zampognare, quanta ricorde, fatte 'e stelletelle, ricorde doce, ca se so' fatte amare. 'A gente s'è cagnata, 'unne 'a stessa, 'e sti natale nun prova sentimente, songhe pasture, so deventate 'e gesso, guarda 'o presebbio, cu' n'aria indifferente. Chesta speranza, che nasce mieze 'o mmale e' ogne 'anno ' nce fa luce 'o buon 'juorno 'na lucia viva 'a 'stu n'atu Natale. 'Nve' vene o genio! e resta' tutte attuorno 'a chistu bammeniello, ca 'mo e' nato, che torna c' 'o destino 'e purta' 'a crocia pe' 'nce f' arricurda' che simme frate, suonno e' ricorde; so' pezzechille doce. [Mario Vastarella] 24 DICEMBRE E’ nu ricamo ‘o suono ‘e na zampogna ca vene ‘a miez’’a via, fredda e sulagna, e dint’a chesta casa chiena ‘e luce, quanti ccose se stanno appriparanno. Nannina sta facenno ‘e zeppullelle ‘e cavule e ricotta mentre ‘o nonno smiccéa scapuzzianno ‘ncopp’‘a seggia ‘o nennillo ca ‘o tira p’’o cazone. Mammema sta taglianno ‘o capitone. Papa’ sbarianno attuorno a stu presebbio, smanea pa’ fa’ appiccia’ na lampadina senza addunarse ca s’e’ fulminata. E pe’ tramente ‘o viento tuppettea ‘nfaccia ‘e llastre, io sento dint’’o core nu tremmulio, nu spànteco, na freva, n’arteteca me frezzechèa ‘int’’e vvene. E sfrenneséo, guardanno chistu vico, me pare d’‘o vedè ammantato ‘e janco isso,ch’è stato sempe puvieriello, all’uocchie mieie mo pare nu rignante. ‘A campana d’‘a chiesia d’‘a Cuncordia mo gia’ se fa’ senti’, sunanno a ffesta, manca nu quarto d’ora a mezanotte, sorema guarda fore a’ na fenesta… «‘O pranzo e’ pronto!» - Nanninella allucca v’arraccumanno stu giarrone ‘e vino si non po’ doppo cca’ se fa ‘a cummeddia; pirciò cercammo ‘e nun ce ‘ntusseca’. Ninno mo dorme ‘mbraccio a mammarella dint’’a stanza tutto è silenzio attuorno, io guardo chesta scena, comm’è bella! Sta pace ‘int’’a famiglia comm’è doce! Ma ‘o nonno rompe stu silenzio ‘e ggelo è ‘o cchiu’ abbasato e dice cose sante: «È nato ‘o figlio ‘e Ddio, Nostro Signore!» …E ce facimme ‘a croce tutte quante. Luciano SOMMA Natale Duie angiulille ‘ncopp ‘o prisepie A vocca aperta stann ‘a guardà Paren' e dicere: “Gesù! Gesù!” Tu proprie mò si ghiut’a nascere! Cu chistu fridd', cu chesta neve, senza na casa, senza nu panne, cu tante guaie? Dice o Signore: “Nun teng nient ma teng tutt, teng l’ammore ca scarfe o core E song venut pe ve purtà Tutt’è tesore e l’umanità” TORNA NATALE … MA COMME ? Che bella ausanza ce steva a Natale! Se faceva 'o presebbio dint''e ccase. Pecchè Gesù Bammino rialava 'a pace dint''o core d''e famiglie. Mo currimmo. Nun ce guardammo 'nfaccia Pecchè nun c'è cchiù tempo pe' ll'amore. Quale Presebbio cu Gesù Bammino quanno se penza a fa' surtanto 'e sorde e nun vedimmo a chi ce sta vicino e stenne 'a mano pe' cerca' n'aiuto'? Dint''e feneste nun se vede cchiù splennere 'e luce chella Grotta antica addo' ogne criaturella, cu 'a festa dint'a ll'uocchie, pusava 'o pasturiello, pazzianno attuorno a sta surgente 'e vita … ll'ommo se scorda 'o Cielo. Quanno sta buono nun se 'mporta 'e niente: né 'e Dio e né d''a gente! Sultanto quanno soffre e tene guaie s'arricorda d''o munno e, quacche vota, s'avvicina a Dio. Natale torn ancor ! Guardammoce cu 'e core cchiù sincere! Vestimmoce 'a re Magge pure nuie ! Portammo 'a gioia 'e nu dono d'ammore!... Dammo na mano a chi soffre… Sulo accussì po' essere Natale. N’at’Alba Luciano Somma L’eco luntano ca chiano se perde d’‘o suono ‘e nuvena, ce porta na nota ‘ntunata d’‘a musica doce ‘e Natale. Pe’ ll’aria, prufumo ‘e Dicembre, l’addore d’‘e ppigne. P’‘e vvie, frasturnate ‘e rummore, na smania ‘e sereno. E ll’uocchie s’aizeno ‘ncielo cercanno na lampa cchiù nova ca desse a stu munno cuncreta certezza, ca desse a nu suonno, vacante ‘e speranza, chiarore ‘e n’at’alba, n’at’alba ‘e Natale. E' Natale Luciano SOMMA 'O palpito 'e mille campane che sonano p''a mezanotte 'a gioia che da' st'ammuina anticipa nu quarantotto. Aunite,c''o sciato 'e ll'affetto, ce sta' tutta quanta 'a famiglia e' doce a campa' stu mumento ch'astregna sti core,atturciglia. Miraculo 'e n'attimo 'e pace na sosta pe' l'anzia 'e l'affanno pe' nuje,ca pasture 'e presebbio, avimmo campato nat'anno. Vurria ca stu tiempo nemico putesse ferma' sti minute, sti ffacce,sti vvocche,sti mmane. Na voce ch'allucca:Salute! Chist'uocchie che guardano 'a cimma 'e n'albero addo' l'abbundanza sta dint''e ggranate d''e lluce ch'appicciano 'o ffuoco 'e st'ausanza. Chist'uocchie ca cercano 'o bbene tra mille culure 'e biancale stunate e 'mbriacate p''o vino mo so' lampe 'e vita,e' Natale! Presepio in Costruzione Ma che fai? Addò miette stu craparo? Chillo te leva tutt' 'a visuale!... S'ha da mettere accanto all'animale! E leva 'a lloco chi sto zampugnaro! E addò se schiaffa? Ma, cretino caro, che d'è, presepio, o fosse funerale?! Comme! Uno appriesso all'ato! '0 castagnaro, '0 scartellatol6, '0 turco e '0 speziale? Distribuisci! Fanne una scenetta! Nu gruppetto c'almeno fa figura! Che significa, llà, chella carretta? E chella pacchianella dint' '0 sciallo! Chella! Chella che porta 'a criatura!... M' 'a piazze sott' 'a coda d' '0 cavallo! Ma c'aggia fa'! Me state mbriacanno in tal modo, ca perdo' e ccerevella! Zi Pascalino ha da fa' che sto ogn'anno! E vattenne, ca si' na muzzarella Stai da tre giorni in casa, revutanno e nun me sai ncullà na casarella! Comme! Tu vide ca te sto ajutanno, e fai l'atto 'e superbia e l'angarella! L'aseniello addo sta?.. Ma che.ne saccio! Le stanne danno na mana'e vernice... E San Giuseppe? Le manca nu vraccio?! E'o voie? È senza corne? E comme va? Tu nun me siente? Bestia! Che nne dice? 'E ccorne?.. Addimandatelo a papà... Nott' 'e Natale Dint'a na grotta scura dormeno 'e zampugnare: dormeno, appese a 'e mura, e ronfeno, 'e zampogne quase abbuffate ancora 'a ll'urdema nuvena; e, ghianca, accumparesce e saglie ncielo, dint' 'a chiara nuttata, 'a luna chiena. Dormeno: a mezzanotte cchiù de n'ora ce manca; e se sparano botte, s'appicceno bengala, e se canta e se sona per tutto 'o vicenato... Ma 'o Bammeniello nun è nato ancora, e nun s'è apierto ancora 'o Viscuvato. Fora, doppo magnato, esce nfucata, 'a gente: ccà d' 'o viento gelato, p' 'e fierre d' 'a cancella, trase 'a furia ogne tanto... E c' 'o viento, e c' 'o friddo ncopp' 'a paglia pugnente, a ppare a ppare, dormeno, stracque e strutte, 'e zampugnare Comm’è bello Natale Comm’è bello Natale, ‘a sera d’à vigilia, è tutta n’alleria, p’à nascita e Gesù. ‘A tavola apparicchiata, l’albero illuminato, o presepio sta stutato, pecchè a mezanott s’adda appiccià. Mammà rint ‘a cucina, pripara e ccose bbone, e fria ‘o capiton, can un ce po’ mancà. ‘A casa è chiena e fummo, allocca già papà: “Arape stù barcone, ca nun se po’ rispirà! ‘O nonn fiddigliuso, ch’e mman rint ‘e mman, accanto a nù vraciere, se piglia tutto ‘o calore. Mammà ha penzat a tutto, po’ pranzo natalizio, ‘e vruoccl, ‘a gallina, ‘e ciociol, ‘o mellone, ‘o dolce, ‘a vermutta, insomma, ce stà tutto. Natale è provvidenza, ce pensa ‘o Bambinello, ‘o ricco e o puveriello, a tutt fa mangià. Pecchè Sulo a Natale? ‘O suono ‘e na zampogna na smania ‘e vulè bbene, N’albero chino ‘e luce nu desiderio ‘e pace. Se stenne ‘a mano pure a n’antico rivale se sprecano l’augurie, è ggià, pecch’è Natale. Sarrà p’‘o clima ‘e festa che porta ‘a ricurrenza, ‘o core cagna veste ritrova na cuscienza. ‘Sta vita, pe’ nu juorno diventa na livella e ‘a ggente tutt’attuorno chisà, pare cchiù bella! Pure n’ommo ‘nfamone carezza n’animale nun fà cchiù ‘o fetendone le pare naturale. ‘O popolo ‘e stu munno, arravugliato ‘e male, diventa bbuono ‘nfunno… Pecchè sulo a Natale? (Luciano Somma) LL’URDEMA NUVENA Luciano Somma ‘E zampugnare sempe cchiù raramente se vedono p’‘e vvie addò ‘a folla pe’ correre nun tene manco ‘o tiempo ‘e risciatà. Pe’ ll’aria, ‘nzieme a nu prufumo ‘e pigne, se spanneno ‘e nnote, letania ‘e Dicembre ‘e na nuvena scurdata… Quanta suspire vedenno na sporta ‘e legnasante… Fore a na chiesia miez’‘o tanfo d’‘a gente, esce ‘o coro ‘e n’Ave Mmaria mentre na mana se stenne… Natale nun è pe’ tutte quante na festa, nu mutivo d’alleria, è quase sempe na malincunia pe’ chi tene ‘int’‘o core na poesia. Addò sta cchiù chella canzone antica ca parlava d’ammore ‘e nu cafone pe’ na signora, ch’era tutta Napule, chien’‘e ricchezza, tutta nu splennore. E mo sti pasturielle, luntane d’‘a famiglia pe’ nu mese accummneciano quanno è ‘a Mmaculata cercanno ‘a carità pe’ na sunata. Dint’‘e vascie addò na vota steveno ‘e madonne, o na figura ‘e Sante, o Giesù Cristo truneggia grossa ‘na televisione. Ma che scennite a fà ‘a sti muntagne d’‘o Mulise, Matese, d’Avellino, nun v’accurgite c’ogge n’automobbile nun v’accumpagna comme a nu traino… Chiagneve ajere nu ciaramellaro, core ‘e pute, nu travaso ‘e bbene mentre sunava, comm’a ffunerale, ‘e nnote triste ‘e ll’urdema nuvena… NATALE Paolo Schettino Quaccheduno ca è furastiero, ca vène a fore, insomma ca nun è 'e ccà dumanda: «Ma a Natale, a cheste parte, che se fà?». S'accummence a primma da' 'Maculata cu' albero, presepe, luci e luciarelle e 'ncoppa 'a grotta nun mancà mai 'a stelletella, pecchè è proprio chella ca purtaje 'e Re cu' 'e doni là a Betlemme, addò nascette 'o Salvatore. 'E zampognari, invece, chilli se vedeno già a nuvembre, ca sonano pe' case pe' poco e niente rallegranno pure 'e cchiù scuntenti. Pe' chi nun 'o sapesse, a cheste parte, 'e vigilie so' 'e principesse e quanno è 'a sera do' ventiquattro, tra 'nu spaghetto e 'nu friariello, 'na 'nzalata e paparacchiella, summente, fichi, datteri, noce e nocelle, s'aspetta 'a mezanotte ca nasce 'o Bambeniello. Nun ce scurdammo po' 'a tumbuliata, ca si manca so' pene amare, cu' 'e scorze 'e mandarino o cu' 'e fasule se segna l'ambo, 'o terno, quaterna e quintina e chi fà tombola se sente 'o Re o 'a Regina. 'A matina do' vintincinque, pe' chi nun era juto 'a sera, se va a sentì 'a Messa e turnanno pe' l'ora 'e pranzo s'accummence 'nata vota, se fà pe' dicere, 'a spuzzechià. A capodanno è 'a stessa storia e quanno scocca l'anno nuovo pare ca se ne scenne 'o munno, 'nu tric-trac, 'na botta e 'nu 'mbiancale, gente che 'mbrinda e chianne 'e commozione, se continua 'a festeggià pe' tutta 'a notte. Chisto è 'o Natale napulitano, ca allegramente passa pure pe' chi spisso, tanto felice nun è.